Poslovne vijesti - Makedonija

Логистички центар од милион евра во Чојлија

Логистички центар, инвестиција од милион евра на компанијата „Глобекс“ ДОО Скопје, е првиот објект што почна да се гради денеска во мултифункционалната зона Чојлија.

- Во логистичкиот центар во почетокот ќе бидат отворени 30 нови работни места, а вкупно се планирани 360 - најави по поставувањето на камен-темелникот, министерот за транспорт и врски Миле Јанакиески.

Објектот се гради на површина од 7.000 квадратни метри и треба да биде завршен во првиот квартал в година. Во индустриската зона Чојлија досега се продадени 65 парцели, а според Јанакиески, за дел од планираните инвестиции наскоро ќе бидат поставени камен-темелници.

Сопственичката на „Глобекс“, Снежана Kокра, најави дека планираат до почетокот на следната година да го оградат целиот простор на кој се гради.

- Тука ќе бидат сместени логистичкиот центар и фирмата-ќерка на „Глобекс“ - „Глобал логистик“, каде ќе има околу 350 вработени. Сите средноразвиени фирми кои сакаат да напредуваат и да градат не треба да се плашат од тоа. Треба да се зголемува бројот на фирмите во Македонија и да се искористат сите услови што ги овозможува Владата - изјави Kокра.

Градоначалникот на Општина Петровец, Борче Митевски, е задоволен од стартот на инвестициите во Чојлија, која е најголема индустриска зона во Македонија.

- Подготвени сме да пречекаме уште поголем број инвеститори. Не се продадени само уште 11 парцели - наведе Митевски.